डहाणू (पालघर) : नोव्हेंबर-डिसेंबर २०१६मध्ये डहाणू तालुक्यातून हजारोंच्या संख्येने वीटभट्ट्या व बांधकाम आणि इतर कामांसाठी स्थलांतरित झालेल्या बहुतांश कुटुंबांचे गावामध्ये पुनरागमन झाले आहे. या सर्व कुटुंबांची तज्ज्ञांमार्फत वैद्यकीय तपासणी करून त्यांच्यावर आवश्यकतेनुसार औषधोपचार करण्याकरिता डहाणूच्या उपजिल्हा रुग्णालयात नुकतेच भव्य शिबिर आयोजित करण्यात आले होते.
या शिबिरात एकूण ८६० (गरोदर व स्तनदा माता-१७१ आणि लहान मुले - ६८९) रुग्णांची तपसणी स्त्री-रोग ब बालरोगतज्ज्ञांमार्फत करण्यात आली. तीन मुलांना पुढील उपचारांसाठी सेलवास येथे पाठविण्यात आले. दोन मातांना डहाणू येथे दाखल करण्यात आले. ३२ महिलांची सोनोग्राफी करण्यात आली. रुग्णांची ने-आण करण्यासाठी प्राथमिक आरोग्य केंद्राकडून वाहनव्यवस्था करण्यात आली होती. रुग्णालयाचे वैद्यकीय अधिकारी डॉ. अरुण यादव आणि तालुका आरोग्य अधिकारी डॉ. अभिजित चव्हाण यांच्या विशेष मार्गदर्शनाखाली शिबिराचे नियोजन करण्यात आले होते. तालुक्यातील प्राथमिक आरोग्य केंद्र, उपजिल्हा रुग्णालयाचे वैद्यकीय अधिकारी व कर्मचारी, तसेच इंडियन मेडिकल असोसिएशनचे डॉक्टर्स आणि डहाणू लायन्स क्लबच्या सहयोगाने हे शिबिर पार पडले.
पालघर जिल्हा परिषदेच्या मुख्य कार्यकारी अधिकारी श्रीमती निधी चौधरी यांनी उपक्रमाला शुभेच्छा देऊन शिबिराची पाहणी केली. उपसंचालक (आरोग्य सेवा, मुंबई, मंडळ-ठाणे) डॉ. रत्ना रावखंडे, पालघर जिल्हा शल्यचिकित्सक डॉ. वानेरे, उपजिल्हा आरोग्य अधिकारी मिलिंद चव्हाण आणि अतिरिक्त जिल्हा शल्यचिकित्सक डॉ. केळकर आदी मान्यवरांनी या शिबिराला उपस्थित राहून मार्गदर्शन केले. जिल्हा परिषदेच्या जनसंपर्क अधिकारी मनीषा निरभवणे यांनी त्या संदर्भातील माहिती दिली.